Home / NEWS TODAY / Royalty / Ha'ele 'A'ahi Fakapule'anga 'a Ena 'Afifio ki Nu'usila

Ha'ele 'A'ahi Fakapule'anga 'a Ena 'Afifio ki Nu'usila

E-mail Print PDF
25 Fepueli 2013  Na'e tu'uta lelei ‘a e Ha'ele ‘a ‘Ena ‘Afifio, Tupou VI mo Kuini Nanasipau'u ki Wellington 'i he efiafi Tokonaki, 23 ‘o Fepueli 2013.

‘I he ‘aho Sapate, na'e fakahoko ‘a e Ha'ele ki he fale lotu ‘o e Siasi Wesley Methodist ‘o Wellington ki he Houa Lotu ‘a e Kainga Tonga, ‘aia na'e fakatahataha kiai ‘a e kainga lotu  mo e kau Faifekau mei he ngaahi siasi kehekehe ‘i Wellington. Na'e tataki ‘a e Ouau Lotu ‘e he Faifekau ‘o e Methodist Parish ko Rev Viliami Finau.

‘E kamata ‘i he pongipongi Monite, ‘a e  Polokalama ‘o e Talitali Fakapule'anga (State Ceremony of Welcome) ‘i  Government House, ‘o kau kiai ‘a e Talitali ‘a e Kau Mauli, (Maori Ceremonial) pea  hokoatu ki he faka'apa'apa fakamilitale (Guard of Honour) pea ki ha Fakaafe fakalangilangi (Diplomatic Reception).  ‘I he hili ‘a e ngaahi Talitali Fakapule'anga koeni, ‘e fakahoko ‘a e audience ‘a ‘Ena ‘Afifio pea mo e Kovana Seniale ‘o Nu'usila,  Rt Hon. General Jerry Mateparae mo hono Hoa, Lady Janine Mateparae.

‘I he Houa efiafi, ‘e fakahoko ai ‘a e Tukupale (Wreath Laying Ceremony) ‘i he National War Memorial kimu'a pea liuaki ‘a e Ha'ele ki Government House ki ha Fakataha mo e kau Director ‘o e Kautaha Ako ko e Polytechnics International New Zealand (PINZ).

‘E fakahoko ‘a e audience ‘a e Palemia ‘o Nu'usila, Rt Hon John Key ‘i he efiafi kimu'a ‘i he Fakaafe Fakapule'anga ‘o e State Dinner.

‘E to e fakahoko ‘ae audience faka'osi ‘a ‘Ena ‘Afifio mo e Kovana Seniale mo Hono Hoa ‘i he pongipongi Tusite kimu'a ia pea Liuaki ‘a e Ha'ele ‘a ‘Ena ‘Afifio ki Auckland, ke hoko atu ki he Konga hono ua ‘o e Polokalama, ‘aia ko e ngaahi Fakataha mo e ha'ele ‘a'ahi ki he ngaahi Va'a Ako ‘e kau kiai ‘a e Kautaha Cognition Education mo e Auckland University of Technology (AUT).

‘E kau ki he Polokalama ‘a e Ta'ahine Kuini ‘a e ‘a'ahi ki he Ngaahi kautaha ‘oku ‘iai ‘enau felave'i mo e kainga Tonga, ‘o kau kiai ‘a Langimalie Integrated Family Health Centre; Fonua Ola Network: South Auckland Family Violence Prevention Network pea mo e Child Youth and Family Centre ‘i Otahuhu, Auckland.

‘E ‘iai foki mo e faingamalie ke fakataha ‘a e Minisita Ako (Minister-in- Waiting)   Hon Dr Ana Taufe'ulungaki mo e Minisita Ako ‘a Nu'usila Hon Hekia Parata.

NGATA'ANGA

Tukuatu moe ngofua mei he: Lord Chamberlain,  'Ofisi 'o e Palasi, Nuku'alofa, 2013.

Last Updated ( Wednesday, 15 May 2013 22:07 )  

Who's Online

We have 235 guests online

PUBLIC ENTERPRISES