Home / NEWS TODAY / Press Releases English

Press Releases

This section outlines official Press and Media Statements issued by the Ministry of Information and Communications in addition to Press Releases from the Prime Minister's Office and other Government Ministries and Departments.

Folau e konga 'o e timi 'a Tonga ki he Sipoti si'i 'a e Pasifiki

E-mail Print PDF

27th 'Aokosi 2013 Folau atu konga 'o e timi 'a Tonga ki he Sipoti si'i 'a e Pasifiki he MV 'Otuanga'ofa

Na’e mavahe atu ‘a e konga ‘o e kau folau ‘a e timi ‘a Tonga ki he Sipoti Si’i ‘a e Pasifiki (Pacific Mini Games) he efiafi Monite 26 ‘Aokosi ‘i he MV ‘Otuanga’ofa koe taumu’a ki Wallis mo Futuna.

Fakatatau ki he fakamatala mei he Sekelitali Seniale ‘o e TASA mo e Pule he folau, Takitoa Taumoepeau, ko e ngaahi sipoti ‘e nima (5) na’e folau he vakatahi ‘a ia ko e Volipolo Matatahi (Beach Volleyball), ‘Akapulu toko 7 (Rugby 7’s), Taekwondo, Va’a moe Hiki Me’amamafa (Weightlfiting) ‘o fe’unga fakakatoa moe toko 47.

Na’e pehe foki ‘e Takitoa na’e toe tanaki atu ki heni mo e Palesiteni, Robyn Kaho Tu’ivakano mo e ‘Ofisa Fakalakalaka ‘a e TASA, Hiko Fungavaka.

Na’e fakamalo foki ‘a Takitoa ki he Pule’anga ‘o ‘Ene ‘Afio ‘o fakafou ‘ia Lord Vaea mo ‘ene Potungaue ki he Ngaahi me’a Fakalotofonua mo e Sipoti (Internal Affairs & Sports) ki he tokoni fakapa’anga ‘o lava ke fakahoko ai ‘a e folau. Na’e foaki ai ‘e he Pule’anga ‘a e tokoni ki he ngaahi tikite ‘o fua ‘a e $450 pea toki fakakakato pe ‘e he ngaahi Sipoti ‘a e $400 ki he tokotaha.

Na’e pehe ‘e Takitoa ‘e toki folau atu ‘a e timi ‘Atelita (Athletics) ia he Tusite 27 ‘a ia te nau puna kinautolu ‘o fou ‘i Fisi hili ‘enau feinga pa’anga pea toki fakalava ‘e he Pule’anga.

Ko e tokolahi fakakatoa ‘o e kau sipoti mo e kau ‘ofisa ‘i he timi ‘a Tonga ‘oku fakafuofua ki he toko 65 ‘i he sipoti ‘e ono (6) ‘e kau atu ‘a Tonga ‘o fe’auhi ai.

Na’e lava lelei mo e fakataha ‘a e timi he Tokonaki kuo ‘osi (24 ‘Aokosi) pea na’e me’a foki ai ‘a e ‘Eiki Palemia, Lord Tu’ivakano pehe ki he Minisita ki he Sipoti, Lord Vaea pea ne koloa’ia ‘a e timi ‘i he poupou mo e fakaloto lahi mei he Palemia mo e hanganaki atu ke tau fakahoko ‘a e Sipoti ‘a e Pasifiki he ta’u 2019.

Na’e fakaha foki ‘e Takitoa ko e tokotaha ke ne to’o ‘a e fuka Tonga (flag bearer) ki he katoanga huufi (Opening Ceremony) ‘e fakafatongia’aki ia ‘a e tokotah ahiki me’amamafa (Weightlifter) ko ‘Ilaniume Finau, ko e ma’u metali koula ‘a Tonga mei he Sipoti ‘a e Pasifiki ‘i Noumea he 2011 pea ‘oku ‘i ai mo e fakatetu’a ‘a Tonga ki ha metali mei ai he sipoti ni.

‘Oku ‘amanaki foki ke kau atu mo Lord Vaea ki he Fakataha ‘a e Kau Minisita Sipoti ‘o e Pasifiki ‘e fakahoko he Sapate ‘aho 1 kimu’a pea huufi ‘a e sipoti he efiafi Monite 2 ‘o Sepitema. ‘Oku muimui folau ki he ‘eiki Minisita ‘a e Tokoni Talekita  ‘Onetoto ‘Anisi mo e ‘Ofisa Sipoti ko Moses Fonohema.

‘Oku fakahoko ai pe mo e Fakataha Lahi Fakata’u (Annual General Meeting) ‘a e Kosilio Sipoti ‘a e Pasifiki (Pacific Games Council) pea ‘e kau atu ki ai ‘a e Palesiteni, Robyn pea pehe ki he Sekelitali Seniale, Takitoa pea mo e ‘Eiki Minisita, Lord Vaea ‘a ia ‘e fakahoko he Sapate 8 Sepitema.

‘Oku hili pe huufi pea kamata ‘a e kau ‘a Tonga he ngaahi fe’auhi ‘a ia ko e VA’A (3 – 6 Sepitema), HIKI ME’AMAMAFA (3 – 5 Sepitema) mo e ‘ATELITA (3
– 6 Sepitema). Ko e BEACH VOLLEYBALL ‘oku lele ia mei he (4 – 10 Sepitema) pea ko e RUGBY 7’s leva mei he ‘aho 10 mo e 11 pea tapuni ‘a e sipoti he Tu’apulelulu 12.

 

Ngata'anga

 

Tukuatu mei he: Tonga and Sports Association National Olympic Committee (TASANOC), P.O.Box 1278, Nuku'alofa, Kingdom of Tonga. Office: (+676) 21041; Fax: (+676) 24127; Account: (+676) 24850 or Email: This e-mail address is being protected from spambots. You need JavaScript enabled to view it

 
Page 1715 of 1930

Who's Online

We have 210 guests online

PUBLIC ENTERPRISES