Home / NEWS TODAY / Press Releases English / Tongan version

Press Releases Tongan version

The Tongan version of the English Press Release versions.(Ko e liliu faka-Tonga e ngaahi ongoongo faka-Pilitania)

Fakahoko Fatongia e Va'a Tau Malu'i Fonua 'a Tonga

E-mail Print PDF

29 Sepitema, 2011. Ko e ongoongo mei he Va'a Tau Malu'i Fonua 'a Tonga ki he ngaahi me'a lalahi 'oku fakahoko fatongia ai e Va'a Tau Malu'i Fonua 'a Tonga ki he uike faka'osi 'o mahina ni.

1. 3rd Contingent to Afghanistan

'Oku 'amanaki ke mavahe atu 'a e Kongakau hono 3 'ae Taumalu'i Fonua 'a Tonga ki Afghanistan he 0455 hrs he henighengi tokonaki 'aho 1 Okatopa 2011. Koe toko 55 koeni tenau tukufolau atu he Air NZ ki Auckland pea mei ai ki Pilitania 'o fou atu 'i Los Angeles. Koe konga kau koeni 'oku taki ai 'a Lieutenant Colonel Tongapo'uli 'Aleamotu'a pea tokoni kiai 'a Lieutenant Commander Brisbane Lokotui pea mo Lieutenant Kiu Kaho. 'Oku fakaangaanga kenau ako uike 8 'i Pilitania pea toki folau ki Afghanistan ke fakahoko 'enau fetongi moe kongakau hono 2 'i he uike faka'osi 'o Novema.

Koe kongakau foki koeni tenau malolo houa 'e 15 'i Auckland pea kuo 'osi teuteu he sotia 'a Pilitania kenau ngaue'aki 'a e loki konifelenisi 'a e Novotel Hotel 'i he mala'e vakapuna kenau malolo ai 'o ma'u me'atokoni pea pehe foki kenau sio tau ai he tau 'a Tonga mo Falanisee. 'E 'i ai foki 'a e 'Eiki Palemia ke fakafeiloaki moe timi pea toki mavahe mai ki Tongatapu ni.

Koe Kongakau hono 2 'oku fakaangaanga kenau tu'uta mai ki Tonga ni he 'uluaki uike 'o Tisema.

2. Ko e Platoon hono 11 'a e Taumalu'i Fonua 'a Tonga ki he RAMSI 'i Solomone.

'Oku 'amanaki ke mavahe atu he 1100 hrs he 'aho Tokonaki 1 'o 'Okatopa 'a e Platoon hono 11 'a e Taumalu'i Fonua 'a Tonga ki 'Aositelelia ke fakahoko ai 'enau ako uike 6 fakataha moe kongakau 'Aositelelia tenau ngaue fakataha 'i Solomone pea nau toki mavahe hake leva ki Solomone fakafuofua ki he uike hono ua 'a Novema.

Koe Platoon koeni 'oku taki ai 'a Lieutenant Tonga Toutai Ma'u pea 'oku fe'unga moe toko 33 fakakatoa. Koe platoon foki koeni tenau ngaue mahina 'e 4 pea toki foki mai 'i Ma'asi 2012. 'Oku 'amanaki foki ke fetongi mai moe Liaison Officer 'a Tonga 'oku lolotonga 'i ai ko Captain Taitusi Falakiseni. 'E fai foki 'a e fetongi koeni lolotonga 'e fetongi 'a e platoon 'a Tonga moe Platoon 'a Papua New Guinea he uike faka'osi 'o Novema.

3. Defence Cooperation Program (DCP) TALKS 2011 'i 'Aositelelia

'Oku 'amanaki ke mavahe atu 'a e 'Eiki Tau Pule 'a e Taumalu'i Fonua 'a Tonga, Brigadier Tau'aika 'Uta'atu ki 'Aositelelia he 'aho Monite 3 Okatopa ke fakahoko 'a e fakataha fakata'u 'a e Taumalu'i Fonua 'a Tonga pea moe Taumalu'i Fonua 'a 'Aositelelia oku ui koe Defence Cooperation Program. 'E Muimui folau foki ki he 'Eiki Tau Pule 'a LtCol Kuli Fakalolo, LCDR Solomone Savelio pea mo SWO1 Sione Pakofe Kava.

Koe angamaheni foki 'oe fakataha koeni 'oku fai ma'u mai pe ki Tonga ni ka na'e fakaafe mai 'a e Chief of Defence 'a 'Aositelelia ke fakahoko ange 'a e fakataha ki 'Aositelelia mo faingamalie ai pe ki he 'Eiki Tau Pule 'a Tonga ke mamata he teu tau 'akapulu 'a e sotia 'a Tonga mo 'Aositelelia he 'aho Pulelulu hono 5 'o 'Okatopa. 'E kau atu foki he polokalama koeni 'a e 'a e 'a'ahi ki he ngaahi 'Apitanga tau 'i 'Brisbane mo Sydney, Aositelelia 'oku lolotonga ako ai 'a e tamaiki sotia Tonga.

Koe fakataha DCP TALKS 'oku 'amanaki ke fai ia he 'aho Tu'apulelulu hono 6 mo e Falaite hono 7 'o Okatopa ki he 'ulu'i 'apitanga tau 'a 'Aositeleia 'i Canberra. Koe fakataha koeni 'e talanga'i ai 'a e ngaahi ako, polokalama tokoni ke he langa fakalakalaka 'a e Taumalu'i Fonua 'a Tonga, koe tokoni ki he fakalele mo monomono 'a e ngaahi vaka le'o pea moe ngaahi polokalama tokoni kahekehe pe 'a Taumalu'i Fonua 'a 'Aositelelia ki he Taumalu'i Fonua 'a Tonga ki he ta'u fakapa'anga 2012-2013.

'E foki mai kau folau he hili pe 'a fakataha pea koe fakamole 'a e folau koeni 'oku fua kotoa pe ia he Taumalu'i Fonua 'a 'Aositelelia. 'E nofo atu pe foki 'a e 'Eiki Tau Pule he 'aho Tokonaki moe Sapate ki he polokalama makehe pe ia 'a e kau Chief of Defence Force 'a e ngaahi fonua 'oku nau kau atu ki he fe'auhi 'akapulu 'a e sotia.

4. Ko e toho moe monomono 'a e VOEA NEIAFU 'i 'Aositelelia

'Oku 'amanaki ke mavahe atu 'a e VOEA NEIAFU he 1000 hrs 'aho Monite 3 'o 'Okatopa ki Cairns, Aositelelia ke fakahoko hono toho ke fakahoko ngaahi monomono hili ia 'a e ta'u 'e 2 meihe monomono lahi fakaloloa ta'u 15 'a e vaka na'e fakahoko he 2009. Koe toho koeni 'a e fai ia 'i he Tropical Reef slipway 'i Cairns pea 'oku 'iai pe moe ngaahi tokoni 'a e Taumalu'i Fonua 'a 'Aositelelia ki he toho koeni.

'Oku 'eiki vaka foki 'a Lieutenant Semisi Tapueluelu pea tokoni kiai 'a Ensign Robert Hala'eua mo Ensign Vaka. Koe kau kauvaka 'e toko 18 pea tenau tuku folau atu 'o fou 'i Vanuatu pea nau toki tu'uta ki 'Aositelelia he 'aho 11 'o Okatopa. 'E nofo pe ai 'a e kauvaka 'o tokoni ki he ngaue ke toe ma'ama'a ange ai 'a e fakamole. Koe toho foki koeni 'oku fakafuofua ki he mahina 'e 2 pea 'oku 'amanaki tenau toki foki mai he 'uluaki uike 'o Tisema.

5. International Defence Rugby Competition Cup


Ko e fe'auhi koia 'a e sotia 'a Mamani 'oku teu mafana pe ia ke kamata he 'aho Tokonaki 1 'Okatopa. 'oKu vaeua foki 'a e fe'auhi koeni 'o fai 'i Sene mo Canberra. Koe timi sotia 'a Tonga 'oku nau nofo pe 'i Canberra pea 'oku pool fakataha 'a Tonga, Aositelelia pea pehe foki ki he People's Liberation Army 'a China. 'E kamata 'a e tau 'a Tonga moe PLA 'a China he 'aho Tokonaki 1 'o 'Okatopa 'i Canberra pea toki tau mo sotia 'a 'Aositelelia 'i he TG Millner Field 'i Sene he 'aho Pulelulu 5 'o 'Okatopa.

Ko e fonua 'e 12 'oku nau kau atu ki he fe'auhi pea 'oku 'iai 'a e timi polisi 'e ua ('Aositelelia mo Samoa) tukukehe 'a e timi sotia. Koe timi tu'ukimu'a 'e 2 he pool kotoa tenau kau atu ki he QF. 'Oku 'amanaki ke fakahoko foki 'a e Quarter Final he 'aho 13 'o 'Okaotpa pea toki mahino mei ai 'a e semi final moe final. Koe toko 35 fakakatoa 'a e kau folau fakataha pe kau va'inga moe kau 'ofisiale.

6. Royal Corp Of Musicians (ROCOM) visit for the Nanjing Military Tattoo, China

'E mavahe atu 'a e ROCOM he 'aho 17 'Okatopa ki Nanjing, China kenau kau atu ki he Nanjing Military Tattoo. Koe fakaafe foki eni mei China pea 'oku nau fua kotoa pe 'a e fakamole ki he folau, nofo moe ngaahi me'a kehe pe he lolotonga 'a e polokalama Nanjing Military Tattoo. Koe fuofua taimi foki eni ke folau atu ai 'a e ifi ki Siaina. 'E 'osi 'a e polokalama koeni ki he 'ago 27 'o 'Okatopa pea tenau hoko atu ai pe ki Beijing ke katoanga'i 'a e Tonga National Day pea nau toki mavahe mai mei ai 'o fou mai 'i Nu'u Sila.

Malo,

LCDR Solomone Savelio
Staff Officer 2 & CC Policy and Plans
Tonga Defence Services

ph +676 23099
mob +676 7745532
Fax +676 23934

Last Updated ( Friday, 30 September 2011 16:19 )
 
Page 226 of 240

Who's Online

We have 229 guests online

PUBLIC ENTERPRISES