Home / NEWS TODAY / Press Releases English / Tongan version

Press Releases Tongan version

The Tongan version of the English Press Release versions.(Ko e liliu faka-Tonga e ngaahi ongoongo faka-Pilitania)

Sea Fakataimi ‘o e Fale Alea ‘o Tongá

E-mail Print PDF

20 Novema 2017 Kuo fakanofo ‘e He’ene ‘Afió Tupou VI ‘a Rt. Hon. Lord Tangi ko e Sea Fakataimi ‘o e Fale Alea ‘o Tongá, ‘o kamata lau ia mei he ‘ahó ni, ‘aho Falaite 17 ‘o Nōvema 2017. Na’e fakanofo ‘a e Sea Fakataimi ‘o e Fale Aleá ‘o fakatatau ki he mafai ‘i he Kupu 61 ‘o e Lao ‘o e Konisitūtone ‘o Tongá.

Ko e fatongia ‘o e Sea Fakataimi ‘o e Fale Aleá ke ne fakaafe’i ‘a e kau fakafofonga Fale Alea kuo filí ke fakahū ange ‘enau fokotu’u ‘o ha fakafofonga kuo fili, ‘a ia ‘oku nau loto ke fili ko e Palēmia Filí. ‘E toki ui leva ‘e he Sea Fakataimi ‘o e Fale Aleá ‘a e fakataha ‘a e kau fakafofonga Fale Alea kuo filí, ‘a ia te nau fakahoko ai ‘enau fakahā loto ‘o fili ‘a e Palēmia Filí mei he kau fakafofonga ‘e fokotu’u angé. ‘E fili foki ‘i he fakataha tatau ‘a e Sea mo e Tokoni Sea ‘o e Fale Alea ‘o Tongá. Koe’uhi ko e fatongia ko ‘eni, kuo ngāue ai ‘a e Sea Fakataimi ‘o e Fale Aleá ke tataki ‘a e ‘Ofisi ‘o e Fale Alea ‘o Tongá ‘i hono tokanga’i ‘o e ngaahi fokotu’utu’u ki hono fakahoko ‘a e ngaahi fatongia ko iá ‘o fakatatau ki he ngaahi fiema’u ‘a e laó.

‘I he lolotongá ni, ‘oku fai ‘a e fakatatali ki he ‘aho ‘e fakafoki ai ‘a e tohi Fekau filí ( writ of election ) mei he Komisoni Filí ki He’ene ‘Afió, Tupou VI. Kuo pau ke fakafoki ‘a e tohi Fekau filí ‘i he pe kimu’a he ‘aho 30 ‘o Nōvema 2017. ‘Oku mahu’inga ‘a e ‘aho ‘e fakafoki ai ‘a e tohi fekau filí he ‘oku kamata lau mei he ‘aho ko iá ‘a e taimi fakalao ke fakakakato ai ‘a e ngaahi ngāue kuo pau ke fakahoko ‘i he teuteu ki he fili ‘o e Palēmia Filí, Sea ‘o e Fale Aleá mo e Tokoni Sea ‘o e Fale Aleá.

‘E hokohoko atu hono ‘oatu ngaahi fakamatala mei he ‘Ofisi ‘o e Sea Fakataimi ‘o e Fale Alea ‘o Tongá ke fakamahino ‘a e fokotu’utu’u mo e founga ki he ngāue mahu’inga ko ‘eni ‘oku tokanga ki ai ‘a e kakai ‘o e fonuá.

Last Updated ( Monday, 20 November 2017 15:59 )
 
Page 3 of 240

Who's Online

We have 217 guests online

PUBLIC ENTERPRISES