Home / NEWS TODAY / Press Releases English / Lotu fakafeta’i fakamanatua ‘o e ‘aho fakamāmāni lahi ‘o e kau faiakó

Lotu fakafeta’i fakamanatua ‘o e ‘aho fakamāmāni lahi ‘o e kau faiakó

E-mail Print PDF

06 'Okatopa 2017 Na’e fakahoko ‘i he pongopongi ni ‘a e lotu fakafeta’i ‘i he Holo ‘o e Kolisi Kuini Sāloté ke fakamanatua ‘a e ‘aho fakamāmāni lahi ‘o e kau faiakó ‘aki ‘a e kaveinga, ‘Fakalotolahi’i e kau Faiakó ke nau faiako Tau’atāina’.

Na’e tataki ‘a e lotu fakafeta’í ‘e he kau faiako mo e kau taki lotu ‘o e Siasi ‘Ingilaní.

‘I he me’a ‘a e fakaafe fakalangilangi ‘o e ‘ahó ‘Aminani Katinali Soane Patita Paini Mafi na’á ne pehē ko e fatongia fakafaiakó ‘oku mafatukituki, pea ko e tau’atāina ‘i he ngāue fakafaiakó ‘oku kei laukau’aki ‘e Tonga ‘i he ako. Ka ‘i he taimi tatau ‘oku tau fakahoko hotau fatongiá ‘o lahi ange ia he me’a na’e ‘amanaki ke tau fakahokó.

“Manatu’i ke tau fakahoko hotau fatongiá ki he tumutumu ‘o e tau’atāina kuo ui tautolu ki ai ‘e hotau fatongiá. Ka ko e ‘aho ko ‘ení ke tau fakamālō’ia ‘a e kau talēkita ako kae ‘uma’ā ‘a e kau faiako, he ‘oku ‘ikai ko ha fatongia faingofua ‘oku mou fakahoko pea ‘oku ‘ilo lelei pē ‘e he fānaú ‘a e mafatukituki ‘o e fatongiá.”

Na’e fakahā foki ‘e Katinali Mafi ko Sisū pē ‘a e faiako ma’olunga tahá ‘o fakatatau ki he lau ‘a e folofolá.

“ Na’a ne fufulu ‘a e va’e ‘o ‘ene kau akó, pea na’a ne folofola mai leva, temou lava ke fufulu ‘a e va’e ‘o e tokotaha kotoa pē. Ko Sisu pē na’a ne ma’u ‘a e tau’atāina kakató, na’á ne feohi mo e kau angahalá pea na’á ne ako’i ‘a e tokotaha kotoa. Ko e faka’amu ia ketau pehē kotoa ‘i he’etau hoko ko e faiako.”

Na’á ne fakamamafa’i foki ki he kau faiakó, ko e kaha’u ‘o e fonuá ‘oku ‘i honau ‘aofinimá, ko e ‘uhinga ia ‘oku fu’u mahu’inga fau ai ‘a e lakanga ‘oku ‘iate kinautolú.

“Ke tau ma’u ‘a e angafakatōkilalo ‘i he’etau fua fatongiá, he neongo ‘a e kau peau ‘o e fonongá, ka ko e ngaahi me’a kotoa pē ‘oku ‘i ai hono ‘uhinga. Kau faiako tau toe nofo ‘o toe siofi hotau ngaahi fatongiá mo ‘etau motó ‘i he ‘etau hoko ko e faiako.”

Na’e fakamālō’ia ai pē ‘e he ‘Eiki Minisitā Ako, Hon. Penisimani Fifita ‘a e ngaahi ngāue kuo lava, pea mo ‘ene talamonū ki he kau faiako kotoa pē ‘i Tonga, ‘i he fua fatongia ‘oku nau fakahokó.

Na’e kau atu ki he lotu fakafeta’i ‘a e kau ‘ofisa ako ma’olunga mei he Potungaue Ako kae pehē foki ki he ako ‘o e ngaahi siasí.

Na’e kamata’aki ‘a e polokalama ha laka mei he Uafu Vuna ki he Holo ‘o e Kolisi Kuini Salote ‘o fakahoko ai ‘a e lotu fakafeta’i ‘o e pongipongí ni.

NGATA’ANGA

Tukuatu mei he Potungaue Fkamatala 'Ea, Ma'u'anga Ivi, Ma'u'anga Fakamatala, Tokangaekina ngaahi fakatamaki fakaenatula, 'Atakai, Feliuliuaki 'o e 'Ea mo e Fetu'utaki

 

Who's Online

We have 623 guests online

PUBLIC ENTERPRISES